martes, 30 de septiembre de 2014

Comunicáu pola retira de la reforma de la llei del albuertu

Dende muyeres en llucha de la CSI, queremos agradecer y felicitar a les muyeres y homes que salieron demientres toos estos meses a les cais pa defender el drechu a decidir de les muyeres.  Persones a les que los medios de comunicación nun sacarán nin darán voz, sinon tolo contrario, pero que lluchan día ente día pa que nun se pierdan los drechos que tanto esfuerzu costaron consiguir.

Nestos últimos díes, dempués  de la retirada de la reforma de la llei del albuertu de Gallardón y la so dimisión, dende los periódicos, les radios y la televisón s’alcen voces otorgándose l'éxitu y algamar ser semeya de portada. Na manifestación convocada pola Plataforma feminista d’Asturies, n’Uviéu, tuvimos un bon exemplu d'esto.  

Nós sabemos que nun fueron les del "Tren de la libertad", nin la FSA- PSOE, nin UGT, nin CCOO y compañía les que consiguieron la retirada de la llei.  Fueron otres persones que nada tienen que ver con esos grupos. Fueron les que salen a la cai a pelear, les que lleven a les sos organizaciones onde militen les idees feministes y les que s'enfrenten a multes que’l mesmu PSOE pon.  


Dende Muyeres en llucha de la CSI parezmos una vergoña les medalles que dalgunos se quieren poner a costa del trabayu de les demás. Pareznos una vergoña que la calaña que ta  gobernando y acabando con Asturies vaya de feminista ya socialista y nun faiga más que retayos nos drechos básicos, sociales y llaborales de les asturianes. Déxennos ensin una sanidá digna, ensin una educación de calidá, con pieslles d'empreses y condergándonos a la precariedá y a la represión.

La llucha ye llarga y dura, pero ye l'únicu camín. La llucha continúa nes cais escontra’l patriarcáu, escontra’l capitalismu y la hipocresía, polos drechos de la muyer y por tolos de la clase obrera. Y recordar que nós nun negociamos, nin vamos vendenos a un gobiernu  que mos roba, mos miente y mos reprime.

¡Puxa la llucha feminista!

¡Puxa la llucha de les muyeres!