CONCENTRACIÓN ESCONTRA LA DISCRIMINACIÓN LLABORAL DE LES MUYERES

ORGANICEN: MUYERES AVILÉS (ASTURIES)

XUEVES 23 DE XUNU. 18:30 h. EL PARCHE (PLAZA’L CONCEYU) D’AVILÉS. ASTURIES

¡A LA FOGUERA COL PATRIARCÁU!

(Adaptación parcial del prólogu de Rosa Regàs, del llibru Rebeldes Perifériques del Sieglo XIX)

Somos rebeldes, somos perifériques, somos MUYERES

El dominiu que la sociedá exerce sobre la mente y el cuerpu de les muyeres al traviés de la historia nun se conforma con sometenos con conceptos como: el deber, el remordimientu o les creencies y obligaciones de la falsa moral. El puñu y lletra del poder tresmitiónos una historia que ta vacía d´actividaes, sublevaciones y tomes de conciencia exercíes poles muyeres al traviés de los sieglos.

Y el poder qu’escribió la Hestoria, incluso de los movimientos feministes y de les reivindicaciones de les muyeres que se trataron, cuando se fixo, ensin dai-yos nenguna importancia, como si se mencionaren delles aventurines, feches por seres humanos de segunda clase. Esta ye la primer discriminación: la de ser muyer.

Asina, les muyeres que punxeron el so coraxe y la so vida al serviciu del ameyoramientu de la situación de les sos conxéneres acaben olvidaes y ocultaes, quiciabes pa que na conciencia de la sociedá nun apaeza más quel modelu de moza, esposa y madre quel poder quixo configurar. Pero somos infinitamente diverses y toes merecemos que se respeten los nuestros derechos, seyamos quien seyamos, vivamos onde vivamos y faigamos lo que faigamos.

Ye necesario que nosotres mesmes tomemos les armes que creamos convenientes pa lluchar contra esi olvidu y reconocer el trabayu que fixeron munches muyeres nunes condiciones sociales terribles.

Pensemos, per un momentu cuántes hestories, revoluciones, llogros, movimientos llideraos por muyeres conocemos y ubicamos na Hestoria: na hestoria clásica, les herexes na Caza de Bruxes de la Inquisición, les desheredaes, na Comuna de París, la Escuela dEducación Llibre de Ferrer i Guardia, les lluches nes fábriques, les Lligues Pacifistes y Antimilitaristes, les Instituciones de Llibre enseñanza y Ateneos obreros, los sistemes de sofitu mutuu, los movimientos llibertarios, masónicos, les Fuelgues de Vientres y control de la natalidá, salú sexual y mental de les muyeres de los baxos fondos, de les probes, de les madres solteres, de les prostitutes, de les preses, de les refuxaes... a la fin, muyeres de les periferies. L’apropiación d’espacios públicos, estudios, profesiones, de la cultura y costumes reservaos primeramente y n’esclusiva pa los homes. Foron y son les nuestres antepasaes y coetánees les que llucharon y lluchamos por alzar la nuestra voz, por despeinar el silenciu.

Igual qu’ardemos nosotres coles inxusticies de les que somos testigos y que sufrimos, mandamos a la foguera al Patriarcáu que tolo quier invadir, controlar y contaminar, que nos quier calladines, obedientes, ensin capacidá pa decidir sobre les nuestres vides y cuerpos.
Sufrimos violencies psicolóxiques, sexuales, físiques y abusos en tolos ámbitos: na casa, na cai, na nueche, nel trabayu, ataques contra los nuestros cuerpos y mentes, siempres col envís de facenos sentir inferiores, que nun somos lo suficientemente bones, que nun damos la talla, que nun somos capaces, qu’o somos santes o somos putes Quieren enmarcanos con etiquetes mutiladores.

Por too ello, ser MUYER ye sinónimu de REBELDÍA, porque con toles torgues que siempres nos punxeron, deprendimos a movenos y a baillar peles caleyes, munches vegaes intransitaes y escures de los márxenes, de la periferia.