LA MUYER Y LA EDUCACIÓN

Les muyeres somos les grandes escaecíes dientro del sistema educativu. Nes aules tamos tresmitiendo la cultura sin muyeres y forxando un modelu de tresmisión cultural falsu, con un desconocimientu  inmensu de la tradición cultural femenina.

Hai dellos estudios fechos sobre la cantidá de muyeres lliteraries, científiques, periodistes, historiadores etc. qu’apaecen citaes nos llibros de testu, qu’amuesan lo demoledores que son estos datos, como por exemplu, el fechu na Universitat de València. De 109 editoriales de los cursos de 1º a 4º d'ESO, solo apaecíen muyeres nos manuales, un 7,5% de les ocasiones. Esti ye un mecanismu de discriminación, qu’esclúi a les muyeres y dexa a les xovenes en sin referentes femeninos ónde vése reflexaes. Esti fechu trai consigo un desconocimientu de la tradición femenina, que conduz a que les muyeres nun formemos parte nin de la memoria cultural, nin del orden social que vemos como nuestro.  Nesti procesu, la educación tien una responsabilidá fundamental.

Ya na Edá Media, la lliteratura culta de la época, amuésanos una idea clara, el propósitu de domesticar a les muyeres y la perda de poder d’estes en toles árees de la vida social. Entamando pola perda de drechos a realizar actividaes económiques, siguiendo pola separación d’espacios entre homes y muyeres, (onde una muyer si salía sola a la cai corría’l riesgu de ser ridiculizada o atacada sexualmente), el control de la so maternidá, del so trabayu, de les apariciones en públicu o de que fueran a visitar poco a les sos families, inclusive dempués del matrimoniu.

Hai un centenar de lleis y nueves formes de tortura escontra les muyeres nesta época, dirixíes a controlar el comportamientu de  les muyeres dientro y fora de casa, pa dexales sin autonomía nin poder social. Silvia Federici amuesanos dellos exemplos nel so llibru Calibán y la Bruja nel que nos reflexa cómo a les muyeres acusaes de “regañones” se-yos ponía un bozal como a los perros y yeren pasiaes peles cais, o a les prostitutes que se-yos enxaulaba y se-yos sometíen a simulacros d’afogamientu, demientres s’instauraba la pena de muerte pa les muyeres condergaes por adulteriu.

La caza de bruxes de la Edá Media ye otru claro exemplu del control de la muyer. A les que yeren consideraes demoniaques se-yos facíen atrocidaes humillantes que ficieron que munches d’elles morrieren quemaes. Dende’l puntu de vista económicu, social, cultural, políticu…la caza de bruxes foi una momentu decisivu na vida de les muyeres. Destruyó too un mundu de práctiques femenines. A partir d’esa derrota, ábrese un nuevu modelu de feminidá: la muyer y la esposa ideal que sigue presente en  nuestros díes, dempués de que les muyeres fueran sometíes a más de dos sieglos de terrorismu d’Estáu.

Dientro d’esti contestu históricu podemos entender por qué nun ye fasta mediaos del sieglu XIX, cuando s’otorga’l drechu a la muyer a ser escolarizada n’escueles institucionales. Por eso, la historia de les muyeres y la educación obligatoria y de baldre ye relativamente curtía nel Estáu español.

Eso sí, fízose n’escueles diferentes a los homes y con asignatures de coser y rezar como prioritaries, con un altísimu grau d’absentismu escolar y con mui poques escueles.  Fasta entós, les muyeres que queríen aprender a lleer ya escribir, teníen que metese a monxes porque yera l’únicu llugar onde se-yos permitíen aprendelo.

La educación concíbese como un drechu universal de toos y toes, sin embargu, nun ye asina, depende direutamente de los gobiernos de turnu. Por eso, faen y desfaen lleis educatives cada cuatro años que nun dan estabilidá nenguna al sistema educativu. Nun-yos importa la educación de calidá, solo implantar les sos ideoloxíes. Un exemplu reciente ye la Llomce, cola que se dexa fuera a dellos coleutivos sociales y plantega una serie de torgues a les families que nun pueden permitise pagar la educación de los sos fíos y fíes.

Pero gobierne quien gobierne, los partíos caltienen sos ideales machistes, patriarcales y discriminatorios pa les muyeres y asina lo amuesen nes sos lleis. La llexislación educativa siempre defende un sistema formativu que discrimina a la muyer. Por eso, ye tan importante pa ellos reproducir un discursu educativu basáu na domesticidá de la muyer, ye dicir, muyer sinónimu de cuidaos, de madre y d’esposa. Llegalizan una formación sexista, diferencial, desigual, cuyu oxetivu ye que la educación de la muyer xire en torno a la familia tradicional española (ya qu'esto n’otros países llaicos nun pasa), desendolcándose la so identidá personal  basáu nel matrimoniu y na maternidá, ensin posibilidá de xenerar un proyeutu social, cultural o llaboral autónomu e independiente.

Como ya s’esponía nel Diariu de Sesiones de les Cortes Xenerales y Extraordinarias 1810- 1813. Madrid

 “Entiendo que, al contrario de la instrucción de los hombres, que va dirigida al intelecto, al cerebro, la enseñanza de las mujeres va dirigida al aprendizaje de las labores propias de su sexo, a las cuestiones domésticas, siendo también necesario recurrir a los principios morales y religiosos”. 

Equí s’amuesa un exemplu cenciello de la educación sexista: La muyer, educada na moral y les llabores de casa, demientres que l’home ta educáu en conocimientos científicos y técnicos, ente otros.

Hai un bon garrapiellu de premises llexislatives que condicionen la educación de la muyer na historia. Eses pautes consoliden un sistema social, desigual, patriarcal y machista nel que les muyeres quedaben supeditaes a l’autoridá del home, que yera siguir siendo’l xefe de la familia. Poro, la muyer ve drásticamente limitada la so capacidá de decidir sobre sí mesma y de vivir la so vida independiente.

La LLOMCE, ye más de lo mesmo y reproduz un sistema endémicu que s’aplicaba hai cuantayá, por exemplu, na Grecia clásica onde tolos filósofos yeren homes. Suponemos entós, que nin una muyer en Grecia foi enxamás capaz de pensar por sí mesma.

Lo poco que se consiguió nos caberos años en materia de drechos de la muyer, encárgase la nueva llei d’erradicalos de nuevu. Lo fai al traviés d’un currículu ocultu y d’una ideoloxía neolliberal enmazcarada que, como siempre, dexa a la muyer nun peldañu, o más, por debaxo del home.

De lo primer qu’esta llei s’esmolez, ye de facer llegal la segregación ente homes y muyeres y de da-y perres a los colexos concertaos que lu faen, sobre too, a los colexos de sectes relixoses como l´Opus Dei. Tamién, de protexer aun más la relixón católica, contando esta asignatura pa la nota media.

Una relixón católica que trata a la muyer como una máquina de reproducción masiva y que defende a un fetu enantes de la vida de la muyer. Una relixón que tacha de descaraes, terroristes y pecadores a les muyeres que salen a la cai a defender el so drechu a la vida, el so drechu a decidir. 

Con esta nueva llei tará encubierta la privatización de les escueles públiques. Los valores de competitividá y fomento de los emprendeores son los puntos fuertes qu’usen pa realzar el capitalismu o la participación de les empreses. Amás qu’inclúi axentes esternos que valoran, si ye o non, productiva una escuela pública que lleva como consecuencia’l pieslle de munches escueles, como por exemplu, les que tienen un altu porcentaxe d’etnies o escueles rurales con pocos neños y neñes.

Otra torga que tamién ta presente na educación actual, ye la muyer como oxetu del home, muyer sometida a unes esixencies del sistema y de la sociedá con unos estereotipos mui marcaos col so cuerpu, que tan creando problemes de salú ente les neñes, problemes d’autoestima, d'inferioridá, complexos… que munches vegaes traen una maxinación de les neñes que nun cumplen esti patrón dende pequeñes y que ye un tipu d’acosu escolar y agresión escontra la muyer que ya sufren dende adolescentes.

Anguaño, la sociedá ta refugando esta educación basada nos valores machistes, patriarcales y capitalistes con más puxu, pero  depende del conxunto de la sociedá que se sustituya una cultura, fasta agora privada de les sos otres protagonistes, les muyeres. Cuya amputación ta dexándonos a toos ya toes, home y muyeres güérfanos d’un saber qu’a to@s nos pertenez. Y la educación debe tar na primera llínea d'aición.

Como dicía Freire 1921-1997. “La educación nun cambia'l mundu, cambia a les persones que van cambiar el mundu”. Por ello, debemos siguir lluchando por facenos un llugar nesta sociedá machista y xuninos cada vez más homes y muyeres pa valtiar esta situación.

¡¡¡LLUCHEMOS POR UNA EDUCACIÓN QUE NUN SEYA SEXISTA, DESIGUAL E INXUSTA!!!

María Fernández. Muyeres en llucha CSI 

-----------------------------------------------------------------------------------------